მისასალმებელი სიტყვა

მოგესალმებით ქუვეითის სახელმწიფოში საქართველოს საელჩოს ოფიციალურ ვებ-გვერდზე.

ჩემთვის დიდი პატივია მრავალსაუკუნოვანი ისტორიისა და უნიკალური კულტურის მქონე ქართველ ერს წარმოვადგენდე ქუვეითის სახელმწიფოში.

საქართველოს ურთიერთობები ქუვეითის სახელმწიფოსთან ეფუძნება სუვერენიტეტის, ტერიტორიული მთლიანობის დაცვისა და ურთიერთპატივისცემის პრინციპებს და მეტად დინამიურად ვითარდება.  

საქართველოსა და ქუვეითის სახელმწიფოს შორის დიპლომატიური ურთიერთობების ისტორია მოიცავს 30 წელს (დამყარდა 1992 წლის 3 სექტემბერს) და ემსახურება პოლიტიკური, ეკონომიკური და კულტურული ურთიერთობების გაღრმავების ამოცანებს.

საქართველო, რეგიონის გამორჩეული ქვეყანაა თავისი სტაბილურობითა და ბიზნესის წარმოების  სიმარტივით. საქართველოს მთავრობის მიერ გატარებული ბოლოდროინდელი რეფორმების შედეგად, ქვეყანაში ჩამოყალიბდა ლიბერალური, უსაფრთხო და კორუფციისგან თავისუფალი საინვესტიციო გარემო. ამასთან, მსოფლიოს წამყვან ეკონომიკებთან გაფორმებულმა თავისუფალი ვაჭრობის შეთანხმებებმა და ლიბერალურ ბაზრებთან ინტეგრაციულმა პროცესებმა მნიშვნელოვნად გაზარდა ქვეყნის საინვესტიციო მიმზიდველობა. მიგვაჩნია, რომ აღნიშნული უნიკალურ შესაძლებლობას ქმნის საქართველოში ქუვეითური ინვესტიციების მოზიდვისა და ურთიერთსასარგებლო სავაჭრო-ეკონომიკური თანამშრომლობისთვის.

მივესალმებით იმ ფაქტს, რომ საქართველო პოპულარული ქვეყანაა ქუვეითელი ტურისტებისთვის. აღნიშნულს ხელს უწყობს პირდაპირი საჰაერო მიმოსვლა ქუვეითსა და საქართველოს ქალაქებს შორის. ასევე ხაზგასასმელია, რომ ქუვეითის მოქალაქეებს და ქუვეითში ბინადრობის მფლობელ პირებს აქვთ საქართველოში უვიზოდ ტურისტულად მოგზაურობის შესაძლებლობა.

იმედი გვაქვს, რომ ეს ვებ-გვერდი საინტერესო და სასარგებლო იქნება ყველა იმ პირისთვის, ვისაც სურს ინფორმაციის მიღება საქართველოს ორმხრივი ურთიერთობების, ჩვენი ქვეყნის საგარეო პოლიტიკის დღის წესრიგის, ასევე, საქართველოს ისტორიის, პოლიტიკის, ეკონომიკისა და კულტურის მრავალფეროვანი თემატიკის შესახებ. აქვე, შეგიძლიათ იხილოთ ჩვენს სტუმართმოყვარე ქვეყანაში მოგზაურობისთვის საჭირო ცნობები, მათ შორის, ინფორმაცია საკონსულო საკითხებზე. მოხარული ვიქნებით, ასევე, თუ ჩვენი საელჩოს საქმიანობას მიადევნებთ თვალს სოციალურ ქსელებშიც (https://www.facebook.com/GeorgiainKuwait/).

მსურს უღრმესი პატივისცემა გამოვხატო ქუვეითის სახელმწიფოში მყოფი მცირერიცხოვანი ქართული დიასპორის წარმომადგენლების მიმართ და გამოვხატო მჭიდრო თანამშრომლობის მზაობა. მიგვაჩნია, რომ მნიშვნელოვანია თითოეულმა მოქალაქემ თავისი წვლილი შეიტანოს საქართველო-ქუვეითს შორის მეგობრული და საქმიანი კავშირების განვითარებაში. მაქვს იმედი თქვენი აქტიური ჩართულობის და მხარდაჭერის ჩვენი ქვეყნის საკეთილდღეოდ!

მადლობას მოგახსენებთ ჩვენს ვებ-გვერდზე შემოსვლისთვის და გისურვებთ წარმატებებს.

პატივისცემით,

ნოშრევან ლომთათიძე

საქართველოს ელჩი ქუვეითის სახელმწიფოში